Memorias de un sacado.

MEMORIAS DE UN SACADO. JAVIER BAPTISTA, S.J.
Ya estoi en Yerusalaim, bendito sea el nombre. Salimos del puerto de Cadis mi padre, Saul Espinosa, mi madre, Rebeca Sidi, yo, Abraham, mis dos germanos, Isaac i Josef, i mi germana chica, Reina. Habemos morado en la sibdad de Toledo, como me relato mi abuelo, desde que arribaron a las cuestas hispaniolas nuestros padres antiguos, quando el enperador Tito los saco de Yerusalaim despues del alsamiento de Bar Coba. Agora la reina Isabela nos dise que ya non somos hispanioles porque somos judeos i que debemos ir de Hispania si non queremos dexar de ser judeos, o pasarnos a la iglesia si desimos que somos hispanioles. La basa fundamentala para sacarnos es que non quiere que biban en Hispania judeos i musulmanos.
La notisia nos truxo el barbero don Salomon Cordobes i le dixo a mi padre que eran hartos los que pensaban quedarse como cristianos antes de perder bienes i ofisio, i que el tenia en penserio ir a Lisboa, i mi padre le dixo que salta a los ojos que eso era lo mesmo que quedarse en Hispania porque tambien en esas partes los judeos seran angustiados. "Si nos vamos a espandir", dixo, "es preferible ir a Yerusalaim". Dixo don Salomon que ansi mesmo disia su mulyer, mas que su germano disia que se iria a la insula de Inglaterra, porque en esa se bibia mas bien que en Yerusalayim o en Lisboa.
Mi padre, que es muy sabido, disia que nosotros eramos mas antiguos en Hispania que los cristianos i musulmanos, i disia que nosotros fablamos el romanse castellano antes que los cristianos i que el lecho intelectual de Hispania i su ermollesimiento nasio en las aljamas judeas i que los judeos enseñamos a los musulmanos arabos la medesina y la filosofia. Dende mi chiques mi abuelo fablaba de Aberroes, Abisena i Maimonides, grandes pensadores judeos. Disia tanbien que non hay sabios mas ilustrados que los judeos arabisados Ibn Latif, Abulafia, Gigatela, que espandieron sus cognosimientos i ideias a Aragon, Barselona i Burgos. Es sabido que somos hispanioles antes que los cristianos i musulmanos.
Los grandes cabalistas an sido Moshé de Leon i Abraham hijo de Isac de Granada. El primero domino mientres siglos la mistica judea, i el segundo fue fiebrosamente admirado por el rabino Izsa Luria, como un grande hombre fiel i antiguo. Los sabio i escritores truxeron contribusiones a la poesia castellana, a la teologuia, a la exegese biblica, y en el canpo espiritual los judeos hispanioles alcansaron posisiones enbidiadas por los otros, no conparado con sus numeros de gentes.
Sabido el edito de la Alanbra, pronunciado por Ferdinando i Isabela en mil i cuatrosientos nobenta i dos, con mucho pesar i lagrimas tomamos el baston del esilio, dexando las tierras que nos vieron naser, creser, multiplicar i trabaxar. La familia de nosotros topamos asilo seguro en tierra de Ysrael, en la cuesta mediterranea. Otros arribaron en la Africa, otros en las probinsias de Ytalia i otros en el inperio de los sultanos otomanos, y otros en Lusitania i en Londra y en Asterdan. Como dixo mi padre, los que fueron a Lisboa fueron tambien sacados en mil i cuatrosientos nobenta i seis.
Agora sabemos que Ferdinando i Isabela an donado de sus arcas de Sisilia mil ducados de oro cada un anyo al conbento de Montesion en Yerusalaim en grasias de abernos sacado de nuestra tierra. Sacamos las santas escrituras pata alimentasion espirituala, i vestiduras, libros, i mi madre puso en su seno la lyabe de nuestra casa de Toledo. Nos fisimos a la mar en el puerto de Cadis. Los arabos en eres Yisrael son menos amables con nosaltres que los arabos de Hispania. Fuimos recebidos por judeos antiguos de Yisrael con carisias. Non hay laboro para mi padre i mi madre lyora porque no ay cosa que lyebar a la boca. Mi abuelo, nasido en Granada, fabla arabigo. Mi abuela, de familia valensiana fabla poco de arabigo, mas entiende todo. Aiga sabido que iria a Yerusalaim, agora su fabla seria mas bien, dice.
Los judeos de Yerusalayim non eran muchos. Fablaban arabigo. Nos resibieron con carisias i nos dieron comida i aposento, mas sabiamos que non podia ser de sienpre eso. Antes de dos menses ya teniamos casa arrendada. Mi padre que era en Toledo hazan i melamed en nuestra sinagoga, fablaba mui bien nuestra lengua santa i tubo puesto como tal en una sinagoga. Mi madre sabia aser comida araba i puso un paradero con muchos parroquianos. Mi padre me dixo que yo estudie ivrit. Mis germanos Isac i Josef fueron dedicados a boticarios i mi germana chica reina ayuda muy bien a mi madre, i como ya es donsella, piensa de contino en un mansebo que se fue a Londra i lyora en su lecho las noches.

.